စင်ကာပူ၏စိတ်ဓာတ်ပိုင်းကိုပါ အတုယူရမည်

စင်ကာပူမြို့

နိုဝင်ဘာလ ၂၈ ရက်နေ့က နေပြည်တော်တွင် ကျင်းပခဲ့သည့် စာနယ်ဇင်း တွေ့ဆုံပွဲတွင် စက်မှုဝန်ကြီးဌာန ပြည်ထောင်စုဝန်ကြီး ဦးစိုးသိန်းက နိုင်ငံတော် သမ္မတကြီး၏ လမ်းညွှန်ချက်နှင့် အညီ ရန်ကုန်မြို့ကို စင်ကာပူကဲ့သို့ဖြစ်အောင် ကြိုးပမ်းမည်ဟု ပြောကြား သွားခဲ့သည်။ တစ်ချိန်က အရှေ့တောင် အာရှတွင် အသန့်ရှင်းဆုံး၊ အတိုးတက်ဆုံး၊ နေချင့်စရာအကောင်းဆုံး မြို့တော်ကြီးသည် နှစ်ပေါင်း များစွာကြာအောင် ပြုပြင်ထိန်းသိမ်းမှု ညံ့ဖျင်းခဲ့သဖြင့် ယခု မြို့အို မြို့ဟောင်းကြီး တစ်ခုနှင့်တူနေရာမှ ယခုလို အစိုးရအဖွဲ့က ထုတ်ဖော်လိုက်သည်မှာ ဝမ်းသာစရာ၊ ကြိုဆိုစရာပင် ဖြစ်သည်။



ဝန်ကြီးဦးစိုးသိန်းပြောကြားသွားခဲ့သည့် စကားထဲတွင် ပြည်တွင်းဘဏ်များထံမှ ငွေချေးယူ၍ ယာဉ်ကြော ပိတ်ဆို့မှုအများ ဆုံးဖြစ်သည့် လမ်းဆုံများတွင် ခုံးကျော်တံတားများတည်ဆောက်ခြင်း၊ ရန်ကုန်မြို့ လူဦးရေကို ၁ဝ သန်းအထိ မျှော်မှန်းပြီး မြို့တော်ဖွံ့ဖြိုးရေးစီမံကိန်းတစ်ခုဆွဲ၍ ပိုမိုကောင်းမွန်သော အခြေခံ အဆောက်အအုံများ တည်ဆောက်ခြင်း၊ မီးရထားလမ်း၊ ကားလမ်းများအဆင့်မြှင့်တင်ခြင်း၊ အများ ပြည်သူ သယ်ယူပို့ဆောင်ရေး ကဏ္ဍတွင် ပြည်ပက လာရောက်ရင်းနှီး မြှုပ်နှံကြရန် ဖိတ်ခေါ်ခြင်း၊ နည်းပညာ အကူအညီ တောင်းခြင်း စသည့် အစီ အစဉ်များလည်း ပါဝင်ပေသည်။

ရန်ကုန်မြို့ကြီးကို စင်ကာပူကဲ့သို့ နိုင်ငံတကာ အဆင့်မီမြို့ကြီးတစ်ခုအဆင့် ရောက်အောင် ကြိုးပမ်းခြင်းသည် မလုပ် မဖြစ် လုပ်ဆောင်ရမည့် ကိစ္စဖြစ်သလို ရုပ်ဝတ္ထုပစ္စည်းပိုင်း အခြေခံအဆောက် အအုံပိုင်းတွင် ဖွံ့ဖြိုးတိုးတက်အောင် လုပ်ဆောင်ရမည်ဆိုသည်ကလည်း ငြင်းမရသောအချက်ဖြစ်သည်။ သို့ရာတွင် ရုပ်ဝတ္ထုပစ္စည်းပံ့ပိုးမှုနှင့်ထပ်တူ အရေးကြီးသော အချက်တစ်ခုကိုလည်း လုပ် ဆောင်ဖို့ ကျန်ပါသေးသည်။ ယင်းက မြို့တော်နေ ပြည်သူပြည်သားများ၏ စည်းကမ်းပိုင်း၊ စိတ်ဓာတ်ပိုင်းဖြစ်သည်။
စင်ကာပူမြို့ကဲ့သို့ဖြစ်အောင် ရန်ကုန်မြို့ကို အဆင့်မြှင့်တင်ရမည်ဟုဆိုရာ၌ စင်ကာပူ၏ မြို့ပြအခြေခံ အဆောက် အအုံပိုင်းဖြစ်သည့် အိုးအိမ်၊ တိုက်တာ၊ ပန်းခြံ၊ လမ်းတံတား၊ မီးရထားလမ်း စသည့် ရုပ်ဝတ္ထုပိုင်းကိုသာ အတုယူ ရမည်မဟုတ်ဘဲ စင်ကာပူမြို့သူမြို့သား များ၏ ထင်ရှားလှသည့် စည်းကမ်းရှိမှု အပိုင်း ကိုလည်း အတုခိုးရမည်ဟု နားလည်ပါသည်။ စင်ကာပူမြို့သူမြို့သားများသည် သန့်ရှင်းမှု အပိုင်း မှာရော၊ စည်းကမ်းလိုက်နာမှုပိုင်းမှာပါ စံပြဖြစ်သည်ဆိုသည်မှာ စင်ကာပူနိုင်ငံ၏ ဝိသေသ ဂုဏ်ထူးတစ်ခု ဖြစ်ပါသည်။

မိမိတို့ မြန်မာနိုင်ငံတွင်မူ လွန်ခဲ့သည့် နှစ်ပိုင်းများအတွင်း ရုပ်ဝတ္ထုပစ္စည်းပိုင်း အထိုက်အလျောက် ဖွံ့ဖြိုးတိုးတက်လာခဲ့သော်လည်း နိုင်ငံသူ၊ နိုင်ငံသား၊ မြို့သူမြို့သားများ၏ စည်းကမ်းပိုင်းနှင့် သန့်ရှင်း သပ်ရပ်မှုပိုင်းတွင်မူ ပြောပလာက်အောင် တိုးတက်မလာသေးသည်ကို သတိထားမိပေမည်။ ဖုန် တထောင်းထောင်း ထနေသည့် လမ်းမဘေးထက်က အအုပ်အဆောင်းမပါ သည့် လမ်းဘေးဈေးသည်များ၊ လူ မြင်ကွင်းတွင် ဖြစ်သလို အပေါ့အလေး စွန့်တတ်သည့် မြင်ကွင်းများ၊ လက်ဘက်ရည်ဆိုင်များမှ ချေး အထပ်ထပ် ကပ်ကာ ညစ်နေသည့် လက်ဘက်ရည် ခွက်များ၊ ရေမြောင်းထဲ အမှိုက်ပစ်ကြသူများကြောင့် မိုးရွာတိုင်း ပင်လယ်လိုဖြစ်နေတတ်သည့် လမ်းမများ၊ ကျပ်သိန်းထောင်ချီ ရာချီတန်သည့် ဇိမ်ခံကား များထက်မှ ကတ္တရာလမ်းမများထက် အမှိုက်ပစ်ချသွားတတ်သူများ၊ အစိုးရရုံး၊ ကန်ထရိုက် တိုက် စသည်တို့ရှိ လှေခါးထောင့်ချိုးတိုင်းရှိ စွန်းပေနေသာ ကွမ်းတံတွေး နီနီအကွက်များ၊ အနံ့ဆိုးများ တလှိုင်လှိုင်ထနေသည့် လူနေရပ်ကွက်များအတွင်းမှ လမ်းဘေးအမှိုက်ပုံကြီးများနှင့် နောက်ဖေး လမ်းကြားရှိ အမှိုက်နှင့် စားကြွင်းစားကျန်များ စသည်စသည်တို့ ပပျောက်ရေးသည် ရန်ကုန်မြို့တော်ကို စင်ကာပူကဲ့သို့ဖြစ်အောင် အဆင့်မြှင့်တင်ရာတွင် မဖြစ်မနေ ထည့်သွင်းစဉ်းစားရမည့် အချက်များ ဖြစ်ပါသည်။

ထိုနည်းလည်းကောင်း ခြေကျင်လျှာက်သူများကလည်း လမ်းကို ကူးချင်သလိုမကူးဘဲ စည်းကမ်းရှိအောင်၊ ကားမောင်းသူတို့ကလည်း မောင်းချင် သလိုမမောင်း၊ ဆဲချင်သလိုမဆဲဘဲ စည်းကမ်းရှိအောင်၊ ယာဉ်ထိန်းရဲတို့ကလည်း စည်းကမ်းနှင့်အညီ အတိအကျ တာဝန်အတိုင်းဆောင်ရွက်အောင်၊ စည်းကမ်း ပိုင်းတိုးမြှင့်လုပ်ဆောင်ဖို့လည်း လိုအပ်ပါသည်။

ထို့ပြင် စင်ကာပူ၏လာဘ်စားမှု၊ ခြစားမှုအနည်းဆုံး၊ ဗျူရိုကရေစီအဆင့်များ အနည်းဆုံးနိုင်ငံ တစ်နိုင်ငံ ဆိုသည့် ဂုဏ်ထူးဝိသေသများကိုလည်း အတုယူဖို့ လိုအပ်ပါမည်။ တစ်ချိန်က စင်ကာပူသားတို့သည် ရန်ကုန်ကို အတုယူခဲ့ကြသည်။ ယခု လည်း ရန်ကုန်သားတို့ စင်ကာပူကို အတုယူရာ ၌ စင်ကာပူ၏ ရုပ်ပိုင်း ဖွံ့ဖြိုး တိုးတက်မှုကိုသာမက ၎င်းတို့၏ စိတ်ပိုင်းဆိုင်ရာ တိုးတက်မှုများကိုလည်း ကျွန်ုပ်တို့ အတုယူမှသာ စင်ကာပူနှင့်တူသော ရန်ကုန်မြို့ကြီး၊ မြန်မာနိုင်ငံတော်ကြီး ဖြစ်လာမည်ဟု တင်ပြလိုက်ရပေသည်။